Hebrews 4
1God la gu hagababa bolo gidaadou e mee di kae hagamolooloo dela nogo helekai iei mee. Gidaadou la gi hagamahi gi pula i gidaadou, gi dee gi de doo tangada ga deemee kae di hagamolooloo. 2Idimaa gidaadou gu longono di Longo Humalia be digaula. Gei di maa dono dahidamee gi digaula ai, idimaa, digaula ne longono hua, gei digi hagadonu. 3Gei gidaadou ala gu hagadonu, gidaadou e kae di hagamolooloo be di hai o dana hagababa mai gi gidaadou, dela gu helekai,“Au gu hagawelewele gu hai dagu hagamodu bolo digaula hagalee loo e ulu gi lodo tenua dela ne hagababa ko au belee hagamolooloo ai digaula!” a
Mee ne helekai beenei, maeaha maa dana moomee la gu lawa di hai i di madagoaa ne hai henuailala. 4Idimaa, di gowaa dulii i lodo di Beebaa Dabu e helekai i di hidu laangi: “Di hidu laangi, gei God ne hagamolooloo i ana hegau huogodoo ala ne hai.” b 5Nia helehelekai aanei e helekai labelaa i di gowaa i golo, boloo:
“Digaula hagalee loo e ulu gi lodo tenua dela ne hagababa ko au belee hagamolooloo ai digaula.” c
6Digau ala ne longono di Longo Humalia matagidagi, digi kae di hagamolooloo, idimaa, digaula digi hagadonu. Malaa, gei hunu gau i golo gu dumaalia anga gi kae di hagamolooloo. 7Di mee deenei la gu haga modongoohia aga go di haganohonoho a God bolo di laangi labelaa e dahi i golo e haga ingoo bolo “dangi nei”. I muli hua nia ngadau e logowaahee, gei God la gu helekai di maa gi David, i lodo nia helekai agoago gu lawa di hihi boloo:
“Maa goodou gu longono di lee o God dangi nei, hudee haga hamaaloo ina godou lodo.” d
8Maa Joshua la gu wanga gi nia daangada di hagamolooloo gi hai be di hagababa a God, gei God la hagalee helekai labelaa i tuai laangi. e 9God la dana laangi huaigolo e hagamolooloo ana dama, be di laangi a God e hagamolooloo i di hidu laangi. 10Tangada dela ma ga kae di hagamolooloo ne hagababa , geia e hagamolooloo i dana moomee, be God dela ne hagamolooloo i ana moomee. f 11Gidaadou hagamahi gi kae di hagamolooloo deelaa, gi dee doo hua dahi dangada be digau de hagadonu.
12Idimaa nnelekai a God le e mouli ge mogobuna, ge koia e gaa i tulumanu dauwa baahi lua, e tuu gi lodo loo gi di gowaa dela e heetugi ai di mouli mo di hagataalunga, gi di gowaa dela e heetugi ai nia dudaginga mo nia uga, ge e hagi aga di hiihai mo nia hagabaubau o tangada. 13Dahi mee e ngala i mua o God ai. Nia mee huogodoo ala i di langi i nua mo henuailala, le e modongoohia i mua o God, go mee dela e haagi ginai tadau hangaahaihai.
Jesus Tagi Aamua Hai mee dabu
14Gidaadou gi daahia gi mau dangihi tadau hagadonu, dela e haga modongoohia aga go gidaadou, idimaa, gidaadou tadau Dagi Aamua Hai mee dabu go Jesus Tama a God dela gu hana gi mua o God. 15Tadau dagi aamua hai mee dabu, hagalee haga de iloo tadau paagege, i tuai ala, gidaadou tadau Dangada Hai mee dabu i golo, gu hagamada i nia ala huogodoo, gadoo be gidaadou, gei mee ono huaidu ai. 16Malaa, gidaadou gi hagadagadagagee, gi mmaanege gi di lohongo king o God, di gowaa iai tumaalia, e kae di aloho mo tumaalia e hagamaamaa gidaadou i di madagoaa ma ga hiihai ginai.
Copyright information for
KPG